Dagiti mannalon a makiramraman iti forest development iti probinsia ti Ilocos Norte ket mabalinen a maseguro ti Philippine Crop Insurance Corporation (PCIC) a makitinnulong iti Department of Environment and Natural Resources (DENR). “Adda agarup 70 People’s Organizations’ ditoy Ilocos Norte ken namnamaenmi a maseguro dagiti high-value crops-da para iti proteksionda no adda kalamidad,” kinuna ni Provincial Environment and Natural Resources Officer Victor Dabalos.
Tapno madanon ti ad-adu pay a mannalon ken mapapartak ti panagrehistroda a mang-avail iti insurance package, nangangay ti DENR-Forest Management Bureau ken ti PCIC iti caravan kadagiti high-value crops iti Centennial Arena.
Dagiti kita ti kabakiran ken agroforestry a mabalin a maseguro iti agdama a programa ti seguro a High Value Crops (HVCs) ket pakairamanan ti falcata, mahogany, gmelina, narra, lauan, goma, kawayan, kape, cacao ken kayo nga agbunga. “Maragsakanak unay ta adda daytoy a programa ti seguro para kadagiti mannalontayo.
Dakkel ti maitulong daytoy kadakuada inton dumteng ti didigra,” kinuna ni Gobernador Matthew Joseph Manotoc iti panagbitlana kabayatan ti pannakalukat ti caravan. (April Joyce Gonzales)