Naituding nga agibunong manen ni Gob. Mathew Marcos Manotoc kadagiti nagduduma nga agri inputs kadagiti mannalon, mangngalap ken agtartaraken ti dingwen babaen iti “Agri ka Dito” program ti gobierno probinsial.
Daytoy ket sungbat pay laeng dagiti immunan a nagkiddaw kadagiti kasapulan da a ramit iti panagtalon, panagkalap ken dagiti livestock raisers a naipadanon ken ni Gob. Marcos Manotoc wenno iti Provincial Agriculture Office.
Ti pannakaibunong dagitoy ket maisayangkat iti INAFEC building iti provincial agriculture office iti oras ti alas tres ti malem.
Dagiti nakiddaw ken maibunong inton bigat ket iti biangti Agri-fishery no adinno a mabenepisyaran dagiti 708 a mannalon ken 8 a farmer’s Association babaen iti Sustainable Development Center ken Agriculture Office.
Agdagup met iti 10,033, 388 ti balor amin dagiti maibunong kadagiti mannalon.
Umabut met iti 369 a livestock raisers ti umawat kadagiti Livestock support nga iwanwan met ti Provincial Veterinary office no sadinno nga umabut met iti 2, 134, 147.00 a pisos ti balor amin dagitoy.
Kabayatan na, 4 met a 4-H Club associations ken 3 a Rural Improvement Club’s manipud kadagiti 6 nga ili ti umawat iti supurta para kadagiti 4H ken RIC nga iwanwan pay laeng to PAO ken ti SDC office nga umabut met iti 403,300.00 ti balor na dagitoy.
Mainaig iti daytoy, ti dagup amin iti maibunong nga agri inputs kadagiti mannalon, mangngalap ken livestock raisers ket 12, 570, 527.00 pesos. (Rod Sadian)
(Source: Provincial Government of Ilocos Norte)