Batac: 3K a pisos, tulong nga ipapaay ti PGIN kadagiti driver ti tricycle ken jeepney ditoy probinsia

0
173

Nairugin ti panangipaay ti gobierno probinsial iti tallo ribu a pisos a “cash assistance” kadagiti driver ken operator dagiti “Public Utility Vehicles” wenno PUV’s.

Visit RPN DZRL Batac

Segun ken ni Atty. Nikki Pilar, mangidadaulo ti Metro Ilocos Norte Council wenno MINC, daytoy ket babaen iti programada nga “Aid to PUVs in Crisis Situation” Program”.

Inbunannagna a kangrunaan a gagem daytoy a maipaayan ti tulong dagiti “transportation stakeholder” a naapektaran iti pandemia.

Kunana a malaksid kadagiti driver dagiti trisikelan ket pinainayun ni Gob. Matthew Marcos Manotoc dagiti driver dagiti pampasahero a jeepney a rehistrado iti Metro Ilocos Norte Council wenno MINC.

Mainaig iti daytoy, inpakaammo ni Pilar a sangapulo ket tallo ribu dagiti driver ti tricycle ken walo gasut dagiti driver ti jeepney a rehistrado iti opisinada.

Inlawlawagna a pinaiyalisto ni Gob. Marcos Manotoc ti pannakairugi ti nasao a programa ti probinsia gapu ta mariknana ti rigat dagiti maseknan gubuay ti agsasaruno a pannakaipangato ti presyo dagiti produkto a petrolyo.

Immun-una ngem iti daytoy, inbunannag ti gobernador a ti tallo ribu a pisos a maipaay a tulong ket inlungalongna pay laeng itay napalabas a tawen.

Kunana a kaipapanan daytoy a saan pay a naipatungpal ti nagsasaruno a pannakaipangato ti presyo dagiti produkto a petrolyo.

Mainaig iti daytoy, impalgakna nga adalen a naimbag ti gobierno probinsial no kasapulan a manayunan ti tallo ribu a pisos a maipapaay a tulong kadagiti driver ti tricycle ken jeepney.

Innayonna a no kasapulan ket mabalin a manayunan ti nailatang a budget ken sakbay nga agtapos ti agdama a tawen ket maipaay ti mapagnunumoan a mainayon a tulong kadagiti maseknan. (Ronald Domingo)

(Source: Provincial Government of Ilocos Norte)

LEAVE A REPLY

Please enter your comment!
Please enter your name here