Mangnamnama dagiti di kumurang a 30 nga Agrarian Reform Beneficiary Organizations (ARBOs) iti nadumaduma a paset ti Ilocos Norte iti nawadwad nga apit inton sumaruno a croppingseason babaen ti kaudian a pannakaiwaras dagiti farm machinery, equipment, ken agricultural inputs, pammadayaw ti Department of Agrarian Reform (DAR).
Aggatad iti nasurok a PHP16.5 milion, ti suporta ti agrikultura ket buklen ti 1,611 a sako ti abono, hauling trucks, maysa a multi-purpose van, dua a yunit ti four-wheel tractors, 16 a water pumps, 11 a knapsack sprayers, uppat a brush cutters nga addaan harvesters, ken innem a hand-tractor nga addaan trailer, ken dadduma pay.
Ti pannakaiwaras dagiti makinaria ken alikamen iti talon ket paset ti Sustainable and Resilient Agrarian Reform Communities (SuRE ARCs) project, multi-faceted program a panggepna a mapaadu ti produktibidad ti agrikultura ken ti matgedan dagiti ARB iti pagilian babaen ti pannakaipaay ti nadumaduma a proyekto ti mekanisasion ken serbisio a suporta.
Kas benepisiario ti four-wheel tractor nga aggatad iti PHP1.4 million, inkari ti Carusikis Agrarian Reform Farmers Association, Inc. iti ili ti Pasuquin nga asikasuenda a naimbag dagiti makinaria iti talon tapno mapadur-as ti produktibidadda.
Nagyaman ni Rogelio Yagyagan, maysa a mannalon-benepisiario manipud iti ili ti Vintar, gapu ta naparaburan iti probinsia ti Ilocos Norte dagiti lider a mangpanunot iti pagimbagan dagiti pada na a mannalon.
Iti biang dagiti mannalon ti Siudad ti Batac, nagyaman ni Mayor Albert D. Chua iti DAR ken iti gobierno nasional gapu iti napapigsa a panagkumitda a mangsuporta kadagiti komunidad dagiti mannalon.
Kagiddan ti Quiling Sur Farmers Association, Tabug Farmers Association, ken ti Camguidan Farmers Association, a nakaawat iti abono ken nadumaduma nga alikamen iti talon, nakaawat met ti Camguidan Multi Purpose Cooperative, a pagaammo gapu iti panagpataudna iti rice krispies, iti brand-new multi- panggep van tapno matulongan ida a mangibiahe kadagiti produktoda iti nalawlawa a merkado, iti kasta, umadu ti matgedan.
Inyebkas ni Ilocos Norte 1 st District Rep. Ferdinand Alexander Marcos ti namnama a kalpasan ti termino ti administrasion ni Marcos, gapu iti pannakaipaulog ti linteg a mangkonkonsonar kadagiti utang dagiti mannalon malaksid pay iti agtultuloy a pannakaiwaras dagiti common service facilities, agbalin dagiti lokal a mannalon ken ti sektor ti agrikultura makabael iti bagina.