Agdagup iti 1,606 a cash for work beneficiaries ti nakaawat iti insentibo kalpasan ti panangipaayda iti 10 nga aldaw a serbisio iti pannakamantener dagiti lugar ti kawayan iti intero a Siudad ti Batac.
Dagiti immawat ket dagiti mannalon a naapektaran iti tikag a naggapu iti 15 a barangay iti uneg ti siudad.
Babaen ti programa nga inrugi ti Gobierno Probinsial ti Ilocos Norte nga idauluan ni Gobermador Matthew Marcos Manotoc iti pannakitinnulong ti Department of Social Welfare and Development (DSWD), nakagun-od dagiti benepisiario iti inaldaw nga insentibo a 400 a pisos.
impaganetget ni Gov. Manotoc ti kinapateg daytoy a gannuat, a nangibaga a saan laeng a napateg ti akem ti kawayan iti pannakapreserba ti danum ken pannakakonserba ti daga no di ket mangbukel pay iti napateg a rekurso para kadagiti masanguanan a programa ti panagbiag.
Pinasingkedan ni Regional Director Marie Angela S. Gopalan ti DSWD Regional Office 1, a timmabuno iti payout, nga agtultuloy ti programa gapu iti agtultuloy a panagkasapulan a mangsustiner kadagiti lugartayo a kawayan.
Impeksa ni Batac City Mayor Albert D. Chua ti panagyamanna kada Gov. Manotoc ken RD Gopalan iti personal a nagatendar iti nasao nga aktibidad ken iti agtultuloy a suporta ken serbisioda iti siudad.
Ti payout ket indauluan dagiti personnel manipud iti Provincial Agriculture Office nga indauluan ni Ms. Ma. Thereza Bacnat, Provincial Social Welfare and Development Office nga idauluan ni Ms. Rochelle Gajes, Ilocos Norte Agriculture and Fisheries Extension center nga irepresentar ni Mr. Hustler Garalde, City Agriculture Office nga idauluan ni Mr. Mark Allan Abad, ken City Social Welfare and Development Office nga idauluan ni Mrs. Lilibeth Maligsay. Â (April joyce Gonzales)
(Source: LGU Batac City)Â