Naikkan iti pammigbig dagiti naaramidan ken serbisyo nga inpaay dagiti barangay frontliners ditoy probinsia bayat iti sarsarangaten tay a pandemia.
Dagiti agarop 17,500 barangay frontliners a bukbuklen iti barangay officials, Barangay Peacekeeping Action Teams (BPATs), Barangay Health Workers (BHWs), Barangay Nutrition Scholars (BNS) ken sabsabalipay a barangay volunteers ket makaawat iti Noche Buena packs, frontliner shirt ken sangaribu a cash assistance ken iti pannakaited iti medicine supply iti kada barangay manipud iti Provincial Government of Ilocos Norte nga idadauloan ni Gov. Matthew Marcos Manotoc.
Kinuna ni Manotoc, nga itultuloy koma dagiti frontliners ti intero a probinsia a patalinaeden iti seguridad dagiti umili kontra iti agraira a virus wenno iti COVID-19.
Kabayatanna, immunan a nagturong ti Provincial Government iddiay Brgy Poblacion iti Brugos, Brgy. Davila iti Pasuquin, Brgy. Lubnac iti Vintar, Brgy. Gabut Norte iti Badoc, Brgy. Nagbacalan iti ili a Paoay, Brgy. Baay iti siudad ti Batac ken iti Brgy. San Lorenzo iti ili a San Nicolas a kas maisa kadagiti benepisyaryo ti Yuletide Assistance.
(Alyssa Beth Pagdilao, RPN DZRL Batac Correspondent)Â Â Â Â
(Source: Provincial Government of Ilocos Norte)