Cagayan de Oro City – Si konsehal George Goking, chairman sa komite sa trade & commerce ug ways & means, misugyot nga unta matun-an pag-ayo ang gipatumang bag-ong pamaagi sa edukasyon tungod kay dili kaayo maayo nga resulta sa unang mga semana sa pagsugod sa klase.
Kini human nasayran sa konsehal ang matod pa paghikog sa usa ka tinun-an tungod sa kalisod sa modular nga pamaagi sa distance learning.
Masabtan nga ang module ihatag ngadto sa mga bata aron ilang tun-an ug tobagon ang mga pangutana nga nahan-ay apan ang dakong problema kun ang bata nag-inusara lamang og walay mga ginikanan nga mapangutana tungod kay kini nanginabuhi man usab.
Dugang pa, ang panahon ug kahago sa pagprinta sa mga modules ilabina sa dagko nga mga tunghaan. Siya misugyot sa paggamit sa mga textbook tungod kay ang mga pangutana anaa naman nakahan-ay sa matag chapter. Kini makatabang usab nga dili na kaayo madako ang gasto ilabina kay panahon karon sa pandemya, sumpay sa konsehal.
Ang dekalidad nga edukasyon gikinahanglan apan niining panahona angayan lamang nga mapadayon ang edukasyon nga dili usab makadugang sa mga nasinating problema, panapos ni konsehal George Goking. (Sangguniang Panlungsod)