Karong panahona nga padayon sa pagtaas ang kaso sa COVID-19 sa Kapitolyo Probinsyal nagpagawas og Memorandum Order GYVBE No. 318 si Gobernador Bambi Emano kalabot sa mga striktong mga gabayan batok sa makatakod ug makapatay nga virus.
Gisugdan na ang pagpatuman niini sa nakalabay nga adlaw kon diin ang mga minimum health protocols gikinahanglan nga strikto nga mapatuman sa tanang panahon ug ang mga Department Head kinahanglan nga mag-monitor sa pagpatuman sa mga musunod:
- Pagsuot sa face shield ug surgical mask sa hustong paagi;
- Pag-obserbar sa physical distancing. Dili pagdungan sa pagkaon kondili ang pagkaon lamang sa tagsa-tagsa nga lamesa/lugar.
- Pag-obserbar sa kanunay nga pagpanghugas sa kamot gamit ang sabon ug tubig kaysa sa pag-disinfect gamit ang alcohol. Pagbuhat og inoras nga skedyul sa mga empleyado aron magpuli-puli sa pagpanghugas og kamot. Ang pagpanghugas kinahanglan nga labing menus 30 ka segundo. Gimando usab alang sa matag usa nga maghugas sa kamot sa dili pa mosulod sa Kapitolyo;
- Kung mahimo, ang mga panagtapok kinahanglan nga malikayan. Sa official gatherings sama sa turn over sa mga projects, ground breakings ug uban pa, kinahanglan nga ang mga partisipante mukabat lamang sa 10 ngadto sa 15 ka mga tao. Dugang niana, ang mga partisipante kinahanglan nga ma swab sa RT-PCR Test sa dili pa sila magtambong sa maong panagtigom. Subay niini, ang PHO kinahanglan nga mahibalo sa mga kalihokan duha ka semana sa wala pa ang gitakda nga petsa sa maong kalihokan. Gisugyot sab nga ang kalihokan pagabuhaton sa Huwebes ug Biyernes diin ang schedule sa PHO alang sa pag swab ipahigayon sa Martes;
- Kung motambong sa mga personal nga mga katigoman nga walay kalabotan sa trabaho sama sa birthday, kasal, lubong, sabong, concert, pista, founding celebration, reunion, bunyag ug uban pa kinahanglan nga mag-file og pito ka adlaw nga leave nga i-charge sa sick o vacation leave nga magsugod sa adlaw inig human sa maong panagtigom. Sa ikapitong adlaw, kinahanglan nga ma swab sa RT-PCR Test sa kaugalingon nga gasto. Ang mga pagsusi sa antigen o antibody dili pagadawaton;
- Ang travel ban alang sa mga empleyado sa Kapitolyo Probinsyal sa laing rehiyon, probinsya ug syudad gawas kung gitugotan sa PHO ug kinahanglan nga motuman sa tanang health protocols ug PHO Guidelines hilabina na sa pagbalik.
Kalabot sa gipakusog nga aktibo nga pagbantay sa Influenza-like Illnesses (ILI), ang tanang empleyado kinahanglan nga magreport dayon sa mga empleyado nga wala magsunod sa mga polisiya bahin sa impeksyon sa COVID-19.
Ang mga Department Head gikinahanglan nga maoy mag-monitor sa mga personal nga travel/gatherings nga gitambongan sa mga empleyado niini ug mo-report sama sa PHO ug Provincial Administrator’s Office.
Ang maong empleyado kinahanglan nga mupailawom og pito ka adlaw nga quarantine nga i-charge sa sick leave o vacation leave.
Mahimo sila nga makabalik sa trabaho kon mogawas nga negatibo ang resulta niini. Kon positibo sa RT-PCR Test, idangup ngadto sa ilang kaugalingon nga home address, siyudad o munisipalidad alang sa isolation.
Niining dako nga hagit nga dala sa pandemya, nagtoo si Governor Bambi ug ang buhatan sa PHO nga giulohan ni Dr. Jerie Calingasan nga ang susi aron dili na mokaylap ang virus mao ang hingpit nga pagtinabanga ug ang pagsunod sa mga hustong gabayan. (Provincial Information Office – MisOr)