Niining pagdangat sa mga CoVid-19 vaccines nagpakanaog og bag-ong Executive Order si Gobernador Bambi Emano aron magtakda og travel protocols alang sa mga travelers ug turista nga gustong mobisita o mouli sa Misamis Oriental.
Ubos sa Executive Order No. 2021 – 005 wala na gikinahanglan ang RT-PCR test ug dili kinahanglan nga moagi sa quarantine ang mga travelers nga gikan sulod sa Region X kung esensyal ug tourism-related ang katuyoan sa ilang pag-anhi sa lalawigan.
Kadtong mga mobiyahe gikan sa gawas sa Rehiyon, kinahanglanan silang magpakita og negatibo nga RT-PCR result nga gikuha sulud sa 72 oras gikan sa ilang pag-abot.
Alang sa mga travelers nga nabakunahan na sa COVID-19 vaccine, gikinahanglan silang magpakita og pamatuod nga sila nabakunahan na sama sa ilang vaccination card.
Kung mapamatud-an nga sila nahatagan na og duha ka dose sa bakuna ug niabot na sa 14 diyas gikan gibakunahan sa ikaduhang dose, dili na sila ipailawom sa quarantine.
Ang tanang mga travelers gikinahanglan usab nga motuman sa minimum public health standards sa ilang pag-bisita sa Misamis Oriental.
Alang sa mga lugar ubos sa Modified General Community Quarantine, matuman ang mga protocols nga gi-isyu sa IATF-MEID.
Samtang ang lalawigan hinay-hinay na nga gi-implementar ang proseso sa vaccination, gisiguro ni Gobernador Bambi nga anam-anamon ang pag-abri sa industriya sa turismo sa Misamis Oriental ngadto sa hingpit nga kapasidad. (Provincial Information Office – MisOr)