Gitagbo ni APP Chairman Emeritus Romeo “Nonong” Jalosjos si Presidente Ferdinand “BongBong” Marcos Jr. (PBBM) atol sa iyang paghidangat sa dakbayan sa Dipolog, kagahapong adlawa, Mayo 24, 2024.
Kahibaloan nga ang pamilya’ng Marcos ug Jalosjos daan na nga sood nga pamilya sukad pa sauna sa panahon sa amahan ni PBBM nga former President Ferdinand Marcos Sr.
Gani sa panahon ni former President Marcos Sr. nahimong kalihim sa turismo si former 1st district Congressman ug Chairman Emeritus Nonong Jalosjos.
Ang pagbisita ni PBBM sa Dipolog tumong niini ang pagpanghatag ug CLOA ug farm machinery and equipment sa mga Agrarian Reform Beneficiaries (ARB) nga nagagikan sa probinsya sa Zamboanga del Norte, Zamboanga del Sur ug Zamboanga Sibugay.
Samtang sa hilisgotanan sa politika, nagpabilin ang kalig-on sa grupo sa APP sa Zamboanga del Norte.
Sa pikas bahin, ang grupo sa Uy nga kaatbang ni Chairman Nonong Jalosjos sa politika gikataho nga niba-iid sa partido ni PBBM.
Kasaligang tinobdan nagkanayon nga si PBBM gisigihan ug imbitar sa mayor sa Dipolog nga mo attend sa groundbreaking ceremony sa tukoron nga bag-ong merkado sa Dipolog apan kanonay usab kini nga gibalibaran sa Presidente.
Tinobdan nakamatimod nga atol sa pagbisita karong adlawa sa presidente gidalidali pod sa kagamhanan sa Dipolog ang pag groundbreaking sa ilang bag-ong merkado.
Siya nakapangutana nga sa kadaghan sa petsa nganong karon man dayon gidali-dali ug groundbreaking ang nasangpit nga edipesyo. (Angelica T. Obina)
(Source: Atty. Ivan Ang)