Un anunciador ya muri na un accidente vehicular del Domingo na población del Diplahan, Zamboanga Sibugay.
Si Coronel Eduard Mallo, el director provincial del pulisiya na Zamboanga Sibugay, ya nombra con el victima como si Harison Mañalac, sesenta’y cuatro años el edad un anunciador de un estacion de radio na municipio de Buug.
Asegun con Mallo cay el accidente vehicular ya ocuri alas dose inpunto del Domingo medio dia na Purok Garcia Uno, Barangay Poblacion, Diplahan, Zamboanga Sibugay.
Asegun con Mallo cay base na investigacion, ya man bangga si Mañalac con un ambulancia despues que nohay le puede nota con el vehiculo ta core pa encuentro conele myentras ta maneja el victima un motorsiclo.
Con Mañalac enseguidas ya lleba para na hospital na municipio del Diplahan, pero ya declara conele muerto el doctor cuando ya llegal na hospital.
Asegun con Mallo cay el dueño del ambulancia envuelto na accidente amo el govierno municipal del Malangas y ta maneja si Marcelo Timod, sincuenta’ cuatro años el edad. (B. Garcia)