El 97th Infantry Battalion (97IB) ya facilita el creacion del federacion de oganizaciones de gentes (People’s Organization) na Zamboanga del Norte, asegun con el militar del Lunes.
Si Tiniente Coronel Jimmy Sanz, el comandante de 97IB, ya habla el creacion del federacion de PO, de quien miembros compuesto de amigos rescatados (Friends Rescued), ya hace en asociacion con el Departamento de Trabajo y Empleyo, o DOLE, del Sabado na quartel del batallion na Barangay Del Pilar, Piñan, Zamboanga del Norte.
El Friends Rescued compuesto del mga miembros y suportadores del New People Army (NPA), quien ya rendi para vive un pacifico y progresivo vida junto con el de ila respetivo familias.
Durante el actividad, ya conduci sila eleccion para organiza con el grupo de oficiales y ya nombra sila con el federado PO como el United People for Peace, Development, and Reconciliation Federation.
“El establicida del United People for Peace, Development, and Reconciliation Federation es un testamento de dedicacion y resiliencia del esfuerzos del mga miembros del comunidad para mejora de ila condiciones social y economico,” sai Sanz ya habla.
Si Alvin Arcete, el representante del DOLE, ya evalua y explica el proceso del federando del PO con mga participantes Friends Rescued.
Ya conduci tamen si Arcete un comprehensivo lectura sobre del Department of Labor and Employment’s Integrated Livelihood and Emergency Employment Program (DILEEP).
Asegun con Sanz, hay continua sila suporta con el federacion por medio de ofrecer guia para asegura el sostenibilidad y exito del oranizacion. (B. Garcia)