Ocho personas, incluwido tres jovencitos, el ya iri cuando el vehiculo ta munta sila ya man bangga na un pono’y palo na Barangay Mangusu, este ciudad.
Si Coronel Alexander Lorenzo, el director del Zamboanga City Police Office, ya nombra con el maga victima como canda Isagani Gumahad, 43, el chuffer; Ruben Tulabing, 37; Anna Marie Tulabing; 44; James Bryan Marquez, 14; Arjolyn Marquez, 38; Jhon Philip Marquez, 13; Juan Miguel Marquez, 12; y si, Lumeriano Marquez, 47.
El accidente ya ocuri maga alas dies y media del Martes aga alla na Sito Mulawin, Barangay Magusu.
Asegun con Lorenzo cay el maga victima muntao na un pick-up y ta viaja para na pueblo del Zamboanga desde’l municipio del Naga na provincia del Zamboanga Sibugay durante el accidente.
Mas del investigacion ta aparese cay ya man bangga na pono’y ipil-ipil el vehiculo ta munta maga victima despues que si Gumahad, el chuffer, accidentalmente ya pisa con el pedal de gasolina en vez del preno myentras ta pasa sila na curvada na Sitio Mulawin, Barangay Mangusu.
Con el maga victima, kien ya iri, ya lleval na Vitali Lying-in Hospital y despues ya transferi canila para na Zamboanga City Medical Center. (B. Garcia, photo courtesy of Zamboanga City Police Office)