Cebu City- Naemosyonal ang pangu sa Police Regional Ofice o PRO 7, Brig. Gen. Albert Ignatius Ferro, sa iyang mensahe alang sa 64 ka polis nga naayo sa Covid 19 nga gitakdang pagawson sa Cremdec o City Resource Management & Development Center sa brgy. Taptap, Cebu City gahapon sa buntag.
Sa usa ka video message sa mga polis atol sa tulumanon nga ilang gitawag og “graduation” ceremony, si Ferro miingon nga nalipay siya nga na-clear na sa virus ang uban niyang sakop ug andam nang mamalik sa ilang trabaho.
Nagkanayon si Ferro nga adunay mga gabii nga dili siya makatug sa paghunahuna sa mga polis nga gipang-covid.
Midugang ang opisyal nga nalipay kaayo siya sa pagkaayo sa mga polis nga maisogong miatubang sa lahi nga matang sa panggubatan.
Nunot niini, miabot na og 137 ka polis ang nakarekober sa 301 ka pasyente sa PNP sa rehiyon busa 164 na lang ang nagpabiling aktibo.
Nianang alas 9:30 gahapon sa buntag, ang 64 ka polis nakadawat sa ilang tagsatagsa ka medical certificate nga nagpamatuod nga virus free na sila ug haom nang mobalik pag-duty kon asa man sila madestino.
Apan subay sa protocol, ang tanang polis nga survivor sa virus papahuwayon una og usa ka semana sa dili pa motrabaho
