Zamboanga del Sur – Mitahan sa pangagamhanang probinsyal ang lima (5) ka mga miembro sa Anwar-Ansang criminal gang gikan sa lungsod sa Dinas, Zamboanga del Sur ug hingpit nga gidawat ni Governor Victor J. Yu kauban ni Provincial Police Director PCOL. Roel L. Lami-ing ug Mayor Eleazer Y. Asoy atol sa gipahigayong seremonya sa Zamboanga Del Sur Police Provincial Office, Camp Abelon, Pagadian City adlawng Biyernes, Hulyo 30.
Nanumpa ang lima ka surrenderee timaan sa ilang pagtugyan ug pagbalik sa puder sa gobyerno ug nga dili na sila mobalik sa kanhing grupo ug andam sila nga motabang alang sa kaayuhan sa tanan.
Matod pa ni PCOL Lami-ing nga wala sila gi-isyuhan og warrant of arrest kundili boluntaryo silang mitugyan sa ilang kaugalingon ug gideklara nga ‘cleared’ na ang ilahang pangalan subay sa ilahang gipanumpaan.
Si Governor Victor Yu nagkanayon nga sa pagkakaron wala pa’y assistance nga ilahang madawat apan giproseso na kini ug gipangitaan na og pamaagi sa amahan sa probinsya aron mahatagan sila og ayuda.
Gipaningkamutan usab ni Mayor Asoy sa Dinas nga madala ug madani ang maong mga kanhing miembro sa criminal gang aron mosurrender sa ilang kaugalingon ug tuod sa walay pagduha-duha kursonada gayod ang maong mga indibidwal nga mosunod sa balaod nga lungsoranon. Nasayran nga wala sila’y gitahan nga mga armas.
Ang hiniusang inisyatiba ni Mayor Asoy ug Governor Yu kaabag ang kapulisan usa ka pagpamatuod nga seryoso ang kasamtangang administrasyon nga makab-ot ang kalinaw sa lalawigan pinaagi sa paghatag og higayon sa mga walhong grupo nga mobalik pagpailawom sa pagdumala sa gobyerno.
(Source: ZDS-Press bureau, photo courtesy of Victory Zamboanga del Sur)