Gibawian na og special permit to travel sa Land Transportation Franchising and Regulatory Board (LTFRB) ang upat ka mga service vans sa Polmargen Transport Multi Purpose Cooperative, gumikan sa natalang kalapasan sa ginapatumang health protocol sa mga public utility vehicles.
Gikumpirma ni General Santos City Public Terminal Administrator, Restituto Facurib nga siya mismo ang nagpasaka og reklamo sa LTFRB batok sa maong transport company gumikan sa wala pagtuman sa “point-to-point destination” sa mga gabiyahiang mga pampasaherong sakyanan.
Butyag pa sa opisyal, ilaha matod pang nasakpan ang maong mga vans nga nag-drop og pasahero sa Crossing Makar area, inay nga ideritso ang mga pasahero sa Bulaong Terminal.
“Naay upat nga taga-Polmargen, gikasuhan namo sa LTFRB og karon, wala na gyud ma-renew ang ilahang special permit, so wala na gyud sila ka-biyahe,” ang tipi sa pamahayag sa opisyal.
Una nang nagpangandam ang LTFRB sa mga transport operators nga posibleng mabawian ang mga nasampit og prankisa sa higayon nga masakpang padayong gasupak sa gitakdang health protocols, taliwala sa padayong bahad sa Covid-19 pandemic. (John Rey Somido)