Kanselado una ang regular session ug mga committee hearings sulod karong semana sa General Santos City-Sangguniang Panlungsod.
Gikumpirma ni City Councilor Jose Orlando Acharon nga nagdesisyon karon si SP presiding officer, Vice Mayor Ton Acharon nga ipatuman sa lockdown ang hawanan sa konseho, human misaka na sa tulo ka mga konsehal ang kasamtangang active Covid-19 patients.
Kini silang city councilors Richard Atendido, Vandyke Congson ug ex-officio member John Salvador Demdam.
Dugang pa niini, gikumpirma usab ni Kagawad Odjoc nga adunay abiso gikan sa City Health Office sa tanang mga konsehal nga boluntaryong mopailawom una sa quarantine aron malikayan ang posibleng pagkatap sa virus.
“Gabii, gitawagan mi nga mag-lockdown gyud karon. Wala gyuy opisina, walay session ug committee hearings,” ang tipik sa pamahayag sa konsehal.
Una nang gipahibalo nilang city councilors Franklin Gacal, Lourdes Casabuena ug Dominador Lagare sa nagkadaiya nilang Facebook pages nga negatibo sila sa virus infection. (John Rey Somido)