El mga autoridad ya aresta tres personas y ya confisca valor de P12.5 millon contrabando na dos separao operaciones contra smuggling na ciudad de Zamboanga, asegun con el policia del Viernes.
El policia nohay mas nombra con el tres arestao suspechao con quien ya aresta na costa oeste del ciudad de Zamboanga.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya habla cay dos del tres arestao personas, todo mga hombre, el ya aresta el mga operativas cuando ya confisca sila P6.8 millon valor de smuggled cigarillo mga ala 1:09 del Miercoles tarde na Purok 6, Barangay Sinunuc, ciudad de Zamboanga.
Asegun con Masauding, el combinao personajes del policia y Buro de Aduana ya confisca 120 cajon y 78 reams de diferentes clase de cigarillo.
Con el mga confiscao smuggled cigarillo ya lleva na Zamboanga City Police Station 8 (ZCPS8) para el propio disposicion.
Si Masauding ya habla, el otro suspechao, un 23 años hombre, ya aresta cuando el combinao grupo del pulis y Buro de Aduana ya confisca P5.6 millon valor de smuggled cigarillo mga alas 10:25 del Miercoles denoche na Zone, Barangay Maasin, ciudad de Zamboanga.
Si Masauding ya habla, el mga confiscao cigarillo ta consisti de 99 cajon y 36 reams de Platinum blanco cigarillo.
El arestao individual y el confiscao smuggled cigarillo ya lleva tamen na ZCPS8 para el propio disposicion.
Si Masauding ya comenda con el mga pulis y personajes del Buro de Aduana envuelto na dos existoso operaciones contra smuggling na ciudad de Zamboanga que ya resulta na aresto del tres individual y confiscacion del mas de P12 million valor de smuggled productos de tobacco. (B. Garcia)