Davao City – Mokabat sa 263 ka mga bag ong migradwar nga sakop sa kapolisan ang nakaandam nang ipakatab sa nagkadaiyang barangay sa rehiyon onse nga una nang nahinluan sa Kasundaluhan kontra sa mga komunistang New People’s Army.
Tumong sa pagdeploy sa Kapolisan nga masigurong mamintenar ang kahusay ug kalinaw sa mga dapit nga giilang
Geographically Isolated and Disadvantaged Areas kun GIDAS.
Nasayran nga ang 263 ka mga bag ong Police nakahuman sa unom ka bulan nga Basic Internal Security Operations Course kun BISOC training sa Mindanao Police Training Camp Brgy. Kapatagan, Digos City, Davao del Sur.
Sumala pa ni Police Regional Office (PRO) 11 director Brigadier General Filmore Escobal nga tumong sa nahisgutang pagbansay sa Kapolisan alang sa ilahang katakos ug kahibalo sa Insurgency Operations ingon man sa Law Enforcement Activities.
Nasayran nga itagana ang mga bag ong migradwar sa Regional Mobile Force Battalion isip kabahin sa PRO 11’s Revitalized-Pulis sa Barangay kun RPSB.
Kahinumduman nga gimugna sa Police Regional Office 11 ang RPSB program nga naka angkla sa Executive Order no. 70 kun Whole of Nation Approach to End Local Armed Conflict ni Presidente Rodrigo Roa Duterte.
Kabahin usab sa tahas sa nahisgutang mga Police nga makatabang sa paghatod ug serbisyo sa kagamhanan ngadtu sa matag komunidad diin sila ipahiluna. (OIC Michael Manguhig, RPN DXKT Davao)
