Total de 25 armas de fuego sin licensia y dos granda el ya rendi el mga hinde licensiao dueño de pusil amediante el campaña del 53rd Infantry Battalion (53IB) en colaboracion con el mga unidades de gobierno local na Zamboanga del Sur, asegun con el militar.
Si Brigadier General Elmer Suderio, el comandante del 102nd Infantry Brigade, ya habla el mga armas de fuego ya rendi del Miercoles mga residentes del Barangay Tarakan, Dinas, Zamboanga del Sur.
Si Suderio ya habla, el mga rendido armas de fuego ta inclui un caliber .50 rifle de Barret, mga rifles M-16, un Carbin, un Garand, un calibre .45 pistola, un 9-milimetro pistola, escopetas caseras, dos granda, y varias otro pusil con desfigurao numeros de serie.
El 53IB ya facilita con el rendida del mga sin licensa armas de fuego en colaboracion con el Zamboanga del Sur Provincial Police Office (ZSPPO), y gobierno municipal del Dinas.
Con el mga rendido armas de fuego formalmente ya entrega con Gobernador Victor Yu del Zamboanga del Sur y Suderio durante un ceremonia na Barangay Tarakan, Dinas.
El rendida del mga armas de fuego sin licensia ta demostra el exitoso del sostenable operaciones ta conduci el 53IB en coordinacion con el unidades del gobierno local na provincial del Zamboanga del Sur. (B. Garcia)