Wala damha sa 141 ka Barangay Health Workers sa dakbayan sa Dipolog ang pagdawat nila sa P3,600 nga financial assistance gikan sa kagamhanang probinsyal sa pagpangulo ni Governor Roberto Uy.
Kini ang gipadayag ni Ms. Leticia Olaguin, ang Presidente sa Barangay Health Workers Federation ning dakbayan atul sa pagpanghatag sa maong ayudang pinansyal, Marso 3, sulod sa Zamboanga del Norte Convention and Sports Center.
Nagpasalamat si Olaguin sa Labaw’ng Makakagahum ug ngadto ni Governor Uy sa maong pinansyal nga suporta ngadto kanila gumikan kay dako na kini’g ikatabang kanila.
Si Governor Uy sa iyang mensahe, ang nagkanayon nga ang maong kantidad gihatag niya kini isip pag-ila sa ilang kakugi ug kinasing-kasing nga pagserbisyo.
“Ang paghatag sa inyong panahon alang sa atong kabus nga kaigsuonan nga walay gihulat nga balos o ganti, gikahimut-an kaayo sa atong Ginoo”, dugang sa amahan sa probinsya.
Si Mayor Darel Dexter Uy nagpasalamat usab ni Governor Uy ug ni Kanhi Mayor Evelyn Uy sa maong ayuda alang sa mga Barangay Health Workers.
Gipasalamatan usab niya ang mga Barangay Health Workers sa pagtambong sa maong kalihukan.
Samtang si kanhi Dipolog City Mayor Evelyn Uy, ang naghisgut kalabot na sa pagsaulog sa Women’s Month ning bulan sa Marso kinsa mihatag ug importansya sa mga kakabayen-an sanglit mao kini ang walay puas nga mipadayag sa ilang suporta ngadto kaniya.
Gipasigarbo usab sa inahan sa Enhanced Gasang Bahandianon sa Umahan (eGBU) Program sa probinsya, diin ang presidente sa mga mag-uuma usa ka babaye kinsa iyang nakita nga maoy nagdaro mismo sa umahan.
Ang eGBU usa ka programa sa probinsya alang sa kapanginabuhian sa mga mag-uuma.
Gipahibalo usab ni Kanhi Mayor Belen Uy nga mikita na ang mga mag-uuma sa eGBU sukad pagpatuman niini sa miaging tuig.
Nasayran nga sulod sa unom ka bulan pa lamang, mikita na ang maong programa sa tres milyones ka pesos.
Mitambong usab sa maong kalihukan si Kanhi 2nd District Congressman Roseller “Matoy” Barinaga ug ang iyang anak nga si Kanhi SK Federation President sa dakbayan sa Dipolog Faith Esther Barinaga.
Gipasalamatan ni Barinaga si Mayor Darel sa pagpadayon sa iyang mga proyekto kaniadto nga wala pa nahuman sa panahon nga siya pa ang mayor sa Dipolog kaniadto.
Matud pa ni Barinaga nga nahidangat sila sa maong kalihukan human sila gi-imbitar ni Governor Uy.
(Provincial Information Center-mbmontederamos)
