Gipasakaan na ug kaso human nadakpan ang 14 ka mga indibidual nga gilakipan sa tag-iya, mga empleyado ug parokyano sa Cleshan KTV and Resto Bar atol sa gilusad nga raid sa mga ginsakpan sa National Bureau of Investigation Southeastern Mindanao Regional Office (NBI-SEMRO) nga nahimutang sulod sa Blue Opera Building, Lanang ning siyudad sa Dabaw, pasado alas nuebe, Biyernes sa gabii, Hulyo 16, 2021.
Ang raid natigayon human sa gilusad nga surveillance sa mga operatiba sa NBI SEMRO, pinaagi sa usa ka undercover agent diin nakompirma nga padayong nag operate ang nasangpit nga KTV Bar nga nagapagpasulod ug mga kustomer, nagatanyag ug inom lakip ang lawasnong kalipay ngadto sa mga customer bisan pa man sa gipatumam nga liquor ban ug curfew dinhi sa dakbayan sa Davao.
Giila ang mga dinakpan nga sila Marajani Damiles Comamao, giingong tag-iya sa KTV Bar; Raquel Pepito Anante , Catalina Palabrica Denaga – Barao, Ruben Casico Cuizon, Larry Anthony Ecol Bohol, Jerick Basalo Damoso, Jonnel Toledo Bongas, Shigeo Kaneko, usa ka Japanese National, Joebane Adulfo Inhanbre, Jannette Baterzal Cortez, Angelie Laput Abellana, Jamaica Labasbas Castillo, Shermaine Labor Antonio ug usa ka Cho Deuk Yon, Korean National.
Nag-atubang na ug kasong pagsupak sa R.A. 10364 kun  Anti Trafficking in Person Act of 2012 ug pagsupak usab sa Liquor Ban ug Curfew ubos  sa E.O. 30 series of 2021 nga adunay kalambigitan sa R.A. 11494  kun  Bayanihan to Recover as One Act sila Comamao, Amante ug Denaga-Barao. Samtang ang lain pang mga dinakpan, ang gipasakaan usab ug kasong kalapasan sa E.O. 30 series of 2021, an Order extending until July 31, 2021 the implementation of Liquor Ban ug Curfew sa siyudad sa dabaw.
Sila Amante ug Comamao nakuhaan ug 3,500 pesos nga marked money nga gigamit sa undercover agent kinsa nagpaka-aron-ingnong kustomer sa KTV Bar nga maoy gibayad alang sa serbisyo sa usa ka babae nga nagtanyag ug lawasnong kalipay. Si Amante maoy nidawat sa kwarta nga nagsilbing sinyales sa mga otoridad nga sudlon na ang KTV Bar. Ang entrapment operation subay sa mando usab ni Davao City Mayor Sara Duterte Carpio.
(Source:Â NBI-SEMRO XI)