Cagayan de Oro – MOKABAT na ngadto sa 6 ka school buildings nga adunay 48 ka mga bag-ong classrooms ang gisubhan ni Mayor Rolando “Klarex” Uy sugod tuig 2023 sa nagkalain-laing barangay sa Distrito 1 ug Disrito 2 ning syudad.
Samtang dugang unom usab ka school buildings nga adunay 36 ka classrooms ang laumang madugang karong tuiga sa tinguha nga mas mapalambo pa ang kalidad sa edukasyon.
Matud ni Mayor Klarex nga tumong sa iyang administrasyon nga mahatagan og kasayon ang mga estudyante ug mga magtutudlo pinaagi sa Tatak Klarex classrooms nga naglangkob na sa kompletong multi-media package sa matag classroom.
Tumong usab ni Mayor Klarex nga daghan pang matabangan nga makalampos sa pagtuon ug makaangkon og mga college degrees ingon man technical-vocational skills pinaagi sa pagbaton og 15,194 college, university ug technical-vocational institute scholars sa academic year 2024-25.
Gani man, buksan na karong tuiga ang City College of Cagayan de Oro sa pagpangulo sa interim president nga si Dr. Jestoni P. Babia nga nagtanyag og degree courses alang sa mga buot makakuha og libre’ng college education.
News and photo by CIO CDO