Cebu City – Dose ka mga armadong tulisan nga naglakip sa duha ka babaye, misud ug mi ransack sa duha ka balay sa Sitio Tipolo, Barangay Bato, Syudad sa Toledo, Martes sa gabii, Hunyo 22, 2021.
Gipanguha ug gipangdala ang mga nagkalainlaing butang sama sa alahas, gadgets ug kwarta nga gipanag-iya sa tulo ka mga babaye nga mokabat ug ₱ 300,00.
Matod pa nga ang mga tulisan nga pulos nag taptap sa ilang mga nawong luwan sa duha ka four-wheeled nga sakyanan ug tulo ka scooters, dayong sud sa duha ka balay ug gipanghulga ang mga tag-iya.
Gibutyag ni Police Lieutenant Colonel Junnel Caadlawon nga ang unang balay nga gisulod gipanag-iya ni Marvie Candol,31 anyos, kinsa dunay live-in partner.
Ang mga tulisan mi mandar ni Candol nga ablihan ang pultahan ug sa dihang nakasulod na kini, ilang gikuha ang bag sa biktima nga duna lay sud nga ₱ 200.
Human niana, mi adto ang mga tulisan sa sunod nga balay nga gipuy-an nilang Christine Brusas Amoda, 34 anyos ug sa iyang live-in partner ug ni Sherilyn Delposo Amodia,27 anyos, minyo.
Gimandaran sab sa mga tulisan nga paablihan ang pultahan apan nagdumili ang tagbalay, hinungdan nga gibuak sa mga armadong tawo ang bintana ug nakasud sa balay.
Gipangkuha sa mga tulisan ang mga cell phones, tablets, singsing, bracelet ug kwentas sa mga tag-iya.
Human nga mahipos sa mga tulisan ang maong mga butang, dali kining misibat agi sa highway.
(Jhon Tadlip/JTY)
(Source: Toledo Police Station)