Un persona el arestao myentras tresientos cuarenta mil pesos valor de suspechao shabu el ya confisca na un campanya contra droga ilegal na provincia del Zamboanga del Sur.
Si Coronel Diomarie Albarico, director provincial de pulisiya na Zamboanga del Sur, ya nombra con el arestao suspechao como si Vangeler Beltran, cuarenta’y uno años el edad y residente de Barangay Sagadan, Baroy, Lanao del Norte.
Asegun con Albarico cay con Beltran ya aresta na un buy-bust operation maga alas sinco cuarenta del Lunes tarde na Purok Mauswagon, Barangay Blancia, Molave, Zamboanga del Sur.
Asegun con Albarico ya puede recubri na posesion de Beltran sincuenta gramos de suspechao shabu que tiene el valor de tresientos cuarenta mil pesos, un portamoneda, un calibre treynta’y ocho revolver con cuatro bala, un celpon, un motorsiclo, un bundle de boodle money que ya pone insima un verdadero mil peso como markao sen y otros pa las cosas na uso de droga ilegal.
Si Beltran detenido ahora myentras ta prepara ya el necesario documentos para planta formal asunto contra conele por violacion del Comprehensive Dangerous Drugs Act of 2002. (B. Garcia)