General Santos City – Usa ka lalaki nga job order employee sa LGU Gensan City nasikop sa buy-bust operation sa Brgy. Sinawal, General Santos City niadtong Agosto 21, 2024, kapin sa usa ka buwan human na-report sa mga otoridad ang iyang illegal nga druga.
Giila ang suspek nga si Fiel Joseph Otacan alyas Doc, 30, ulitawo, Meat Inspector nga nadestino sa Office of the City Veterinarian. Nasikop usab ang iyang kauban nga giilang si Maria Luz Oraiz y Villabito, 43, walay trabaho, residente sa Brgy. Apopong, General Santos City.
Nasakmit atol sa operasyon ang duha ka sachet sa gituohang Methamphetamine hydrochloride o shabu ug usa ka sachet sa gipilo nga sigarilyo nga adunay sulod nga gituhoang pinaugang dahon sa marijuana.
Ang ilegal nga drugas adunay gibanabana nga kantidad nga Php 14,400.00 Ang suspek, gitanggong sa PDEA ROXII Custodial Facility, mag-atubang og kasong kalapasan sa Section 5 ug 11, Article II sa RA 9165.
Ang operasyon hiniusang gihimo sa PDEA Sarangani-Gensan Provincial Office, PDEA Regional Special Enforcement Team, ug General Santos City Police Office Station 2.