General Santos City – Gi-ila sab sa mga sakop sa Sangguniang Panlungsod (SP) ning s’yudad sa General Santos isip HERO ang usa ka bata atol sa session sa Konseho kagahapong adlawa, Septembre 26, 2023. Gi-ila kini nga si Ramonito Masaglang Jr. 14 anyos, taga Purok San Miguel, Brgy. Calumpang, Gensan.
Gikabutyag nga niadtong Agosto 23, 2023 kalit lang nagkasunog sa nahisgotang Purok gu pas-pas nga midilaab ang dakung kalayo sa mga kabalayan nga gikahikurat sa mga residente sa maong lugar ug natarantar sa pagpanagan. Sa maong higayon, nakita matud pa sa batang si Ramonito ang usa ka paralisadong tigulang lalaki nga nagpangalang Francisco nga bu-ot mo-ikyas sa sunog, apan dili kini makalakaw ug makadagan.
Dali matud pa kining gidu-ol sa maong bata ug gilayong gipas-an palayo sa sunog, hinungdang naluwas ang kinabuhi niini. Sa maong takna, wala matud pa panumbalinga sa maong bata ang kabug-at sa tugulang nga iyang giluwas, pinaagi sa pagpas-an aron lamang masalbar ang kinabuhi niini gikan sa gadilaab nga kalayo. (Rey G.Ombaña)
Photos: Gia Morales