Anaa sa ₱ 51-million pa ang bayrunon sa General Santos City government sa natala nga “hotel accommodation” ug “ayuda” expenses, ilawom sa ginahisgutan karong ₱ 232-million Statement of Supplemental Appropriation o Supplemental Budget No. 3.
Sa nakuhang kopya sa maong budget proposal, napatik sa Other Maintenance and Operating Expenses sa Disaster Risk and Management Office (DRRMO) ang kinatibukang kantidad nga P11,604,862.97 nga “unpaid” o wala pa mabayri nga obligasyon sa nagkadaiyang hotels sa siyudad.
Gawas sa maong bayrunon, naglaan usab ang city government og ₱ 40,350,000 nga budget sa particular item nga “ayuda” ug “central kitchen.”
Kadagahanan sa maong gastos ang nagamit sa Covid-19 response sa siyudad.
Sa pagpanubay kang former SP-committee on finance chair, Atty. Franklin Gacal, gikataho sa opisyal nga anaa sa 1,500 persons nga gilangkuban sa mga naka-quarantine ug nagbantay sa mga checkpoints, ang adunay meal budget gikan sa city hall.
Sa karon matod pa, anaa sa ₱ 1-million kapin ang utang sa LGU sa supplier sa karneng baka sa maong mga gi-pang-order nga food packs.
“The city is allegedly feeding 1500 persons (quarantined people, checkpoint s) every meal. Every week 2 cows are consumed. As of today, 1m plus is owed to the supplier of the beef.”
Gikahibulungan usab ni Gacal ang maong gastos sa gobyerno, samtang naka-pending pa ang approval sa budget. (John Rey Somido)