Apil sa pagasutaon ni Senador Manny Pacquiao sa iyang pagtuki sa epekto sa Rice Tariffication Law ang pondo nga ₱ 10 Bilyon ka pesos subay sa gilatid sa maong balaod nga mutagana og Rice Competitiveness Enhancement Fund kon RCEF (ar-sef) matag tuig sulod sa unom (6) ka tuig pang-ayuda sa mga mag-uuma.
Nindot ang katuyuan sa Rice Tariffication Law tungod nag-siguro kini nga daghang bugas sa mga palengke pinaagi sa suplay sa bugas gikan sa mga lokal nga mag-uuma ug sa mga imported rice gikan sa gawas sa nasud. Tubag kini sa nasinatian nga rice crisis niaging mga tuig. Tuod man, nidaghan ang suplay sa bugas sa merkado. Ang problema ang presyo na usab sa palit sa palay nga ni-barato. Dili pud dakong giubos sa presyo sa matag kilo sa bugas.
Samtang, si Congressman Ruel Pacquiao nagbutyag nga maningkamot kini nga mabutangan og regional office sa PHilMech (fil-mek) o Philippine Center for Postharvest Development and Mechanization. Suportado kini nga lakang ni Governor Steve Chiongbian Solon ug nitanyag dayon og luna ang Gobernador nga katukuran sa maong regional office sa Sarangani Province. Hikutaron usab sa congressman ang kamugnaan sa opisina sa National Irrigation Administration sa Sarangani.
Subay sa Rice Tariffication Law, singkwenta porsyento (50%) sa maong Dyes Bilyones ka pesos nga RCEF ang maadto sa PHilMech aron maoy muatiman sa mga gikinahanglan nga makinarya, ekwipo ug uban pang kagamitan sa mga mag-uuma, wala pay labot ang mga binhi ug pautang nga apil gipondohan.
Nilungtad og duha (2) ka oras ang dayalogo ni Senador Pacquiao sa mga rice farmer sa probinsya sa Sarangani niaging adlaw nga Byernes sulod sa Sarangani Capitol Gymnasium. Gikalipay kini og dako sa mga mag-uuma sa humay nga gipaminawan ang ilang mga sentimento.
(Sarangani – Public Information Office)