DAVAO CITY- Namatay gilayon ang upat ka mga tao human ang nahitabong disgrasya sa usa ka Forward Trak sa may Diversion Road Barangay Matina Pangi pasado alas onse sa buntag kagahapong adlawa.
Sumala ni Police Staff Sergeant Ryan Ingutan sa Talomo PNP nga base sa inisyal nga imbestigasyon, nawad-an og preno ang forward truck hinungdan nga wa na ma-control sa driver ug mibangga sa poste sa kuryente sa kawayanan nga bahin sa nasangpit nga lugar.
Nasayrang gipangdala ang mga patayng lawas sa driver ug tulo ka mga pahinante sa truck sa Villa Funeral Parlor sa Toril ning dakbayan sa Davao.
Pinasubay sa imbistigasyon sa Talomo Police Precinct giila ang mga nangamatay nga sila alyas Tata (unidentified driver) ug tulo ka mga pasahero niini nga sila si Meljay Quillosa, taga Waan Buhangin, Rolly Ambas Balagisi, 26 yrs old, Paquibato ug si Justin Libayaw 19 yrs old, Paquibato
Nasayran sa imbestigasyon nga gikan matud pa sa Cabantian ang truck nga dunay kargang mga bakal padulong sa Toril ning syudad.
Pahimangno usab ni Talomo PNP Chief of Police Major Ronald Lao ngadto sa mga drivers nga sutaon usa ang parte sa mga sakyanan og nag-function ba og tarong ayha mubyahe ingon man mag-amping sa pagmaneho. Kahinumduman nga upat usab ang patay sa nahitabong aksidente kagahapong adlawa sa Binugao, Toril tali bus ug wing van.