Un persona ya muri na accidente vehicular del Lunes madrugada na municipio de Dumalinao na provincia del Zamboanga del Sur.
Si Coronel Diomarie Albarico, el director provincial del pulisiya na Zamboanga del Sur, ya nombra con el victima como si Jhon Banguisio, cuarenta’y dos años el edad y residente de Purok Santan, Barangay Tulawas, ciudad del Pagadian.
Base na investigacion cay si Banguisio ta durmi na medio del camino na Purok tres, Barangay Motosawa, Dumalinao, maga ala una madrugada del Lunes, cuando ya man bangga conele el un trak ta maneja si Danilo Calimot, sesenta’y tres años el edad.
Si Calimot de camino para na ciudad de Iligan desde’l ciudad de Zamboanga durante el tiempo del accidente.
Asegun con Albarico cay ya lleva con Banguisio na Zamboanga del Sur Medical Center para el kurada medical per por mal suerte ya declara conele muerto cuando ya llegal na hospital.
Si Calimot y el su vehiculo ta esta bajo na custodiya del pulis na municipio de Dumalinao. (B. Garcia)