El un compania del barco, nombra como el “Fast Cat” el esperansao servi con el ruta de Zamboanga para na Basilan y ida’y vuelta.
Ese anuncio ya ase si Señor Mark Saladino, el Vice Presidente para de Operaciones del Fast Cat, cuando ele y otro mga oficiales tecnical del compania ya visita de cortesia con el gobernador del Basilan Hadjiman Hataman-Salliman del Miercoles.
Ya acompania canila si Moumar Muarip, el “board member” del provincia de Basilan, quien ya propone el entrada del compania na ruta de Zamboanga para Basilan y dia’y vuelta del año 2017.
Asegun con Muarip, ya demora el servida del compania na mencionao ruta por causa del pandemia.
Asegun con Saladino, ta finaliza ya sila con el preparacion para el primer viaje del de ila barco, un plano que mas de seis años esperando.
Si Saladino ya informa con Salliman, ta prepara ya sila el ponida del un rampa para donde pundia el de ila barco na pantalan del ciudad de Isabela.
Asegun con Saladino, el de ila barco tiene el velocidad maxima de 19 nudos (knots) y tiene el capacidad de 300 pasajeros, 40 coche, siete trak y autobus.
Si Saladino ya habla, de ila barco tiene elevador para servi con el mga personas mayores y personas de discapacidad.
Asegun con Salliman, en entrada del Fast Cat ay omenta con el trafico de comestibles y servicios desde y para na continente del Mindanao.
Mientras tanto, si alegre si Muarip cay despues de esperar seis años, ay realiza ya el sueño para tene omento y nuevo barco que ay servi con el provincia de Basilan.
Asegun con Muarip, el barco del Fast Cat es un grande ayuda para con el creciente populacion del Basilan, especialmente para con el mga estudiantes y trabajantes quien ta munta na barco todo’l dia desde ciudad de Zamboanga para na provincia del Basilan y ida’y vuelta.
(B. Garcia, photo courtesy of Ronda del Basilan)