Un reporter y un empleyado del gobierno local el ya muri y otro ocho personas el ya iri na un incidente de incendio na ciudad de Zamboanga, asegun con el Zamboanga City Fire District (ZCFD) del Martes.
Asegun con Superintendent Christopher Morales, el ZCFD marshal, el incendio ya principia mga alas 2 del Martes aga na calle Don Alfaro, Barangay Tetuan, ciudad de Zamboanga.
El mga fatalidad identificao como canda Allen Abastillas, un reporter de un periodico local, y si Adolfo Vicente Jr., un empleyado del Oficina del Medio Ambiente y Recursos Naturales del Ciudad.
Asegun con Emerson Salvador Santiago, un colega y dueño del casa onde ta esta si Abastillas, el incendio ya principia na un casa na costao del su casa y enseguidas ya man calayat y ya destrosa con nueve caserias todo hacido de palo.
El dueño del uno del nueve quemao casa un reporter tamen de un estacion local de television.
Si Santiago ya habla, si Abastillas nohay mas puede sale na casa durante el quema cuando ya entra le adentro para saca su mga importante cosas personal y documentos.
Si Abastillas ta esta na casa que ta dale arquila si Santiago por 10 años ya.
Ta ocupa si Abastillas con el uno de sinco cuarto de dos andanas casa de Santiago.
Asegun con Santiago, si Vicente, su cuñao, ya entra tamen na casa para saca su cosas personal cuando ya mira le con Abastillas ya bira adenro del casa.
Igual con Abastillas, nohay mas tamen puede sale si Vicente na casa que ta quema aquel tiempo.
Asegun con Morales, el incendio ya llega na terser alarma y ya puede controla mga alas 3:08 del aga. Completamente ya puede apaga con el fuego mga alas 6:23 del aga.
Asegun con Morales, el estimao valor de destroso de propiedad ya alcansa na P9.6 millones.
Asegun con Morales, el investigador del incidente tiene pa que determina el causa del incendio. (B. Garcia)