Maga autoridad ya recubri droga ilegal cuando ya aresta sila sinco personas y confisca mas de un milyon contrabando del Sabado na vicinidad del isla de Manalipa, este ciudad.
Asegun con Coronel Alexander Lorenzo, el Zamboanga City Police Office director, cay ya puede sila sabe tiene un pakete de droga ilegal, compuesto de dies gramos shabu, hunto na maga contrabando por medio del ayuda del K9 del Philippine Drug Enforcement Agency (PDEA).
Con el pakete de shabu que tiene el valor de sesenta’y ocho mil pesos ya pone adentro de un ice chest de fescao y mesclao maga cortao rama de palo y ojas.
Asegun con Lorenzo cay el personajes del Second Zamboanga City Mobile Force Company y Buro de Aduana ta man patrulya cuando ya columbra sila con un jungkong con sinco personas muntao y lleno de contrabando na vicinidad del isla de Manalipa del Sabado.
El maga contrabando compuesto de treynta cahon de cigarillo que tiene el cantidad de mas de un milyon pesos y trese cahon de pansit con el valor del veinte sinco quinientos pesos enseguidas ya confisca cay ni uno del sinco personas muntao na jungkong el ya puede presenta documento del de ila cargamento.
Con el sinco personas que ya aresta maga autoridad ya conose como canda Nurhasi Jibal Said, Julkipli Lamalan, Tony Dahi, Lijon Salad Albani y Anam Dammang Said, todo residentes del municipio de Mabuhay, Zamboanga Sibugay.
Asegon con Lorenzo cay base na investigacion, el maga contrabando estaba na municipio de Jolo na provincia de Sulu y para lleva na Mabuhay, Zamboanga Sibugay.
Si Lorenzo ya habla cay ay planta tamen sila formal asunto de posesion de droga ilegal contra con el sinco arestao personas puera el asunto de smuggling. (Bong Garcia, Jr., photo courtesy of Zamboanga City Police Office)
