El principal suspechao na emboscada del mga pulis na Barangay Miculabo, Picong, Lanao del Sur, ya rendi na autoridad, asegun con el policia del Martes.
Asegun con Police Colonel Robert Daculan, el director del policia na Lanao del Sur, con el principal suspechao quien ya rendi personalmente ya entrega si Bustaman Abdul, el barrio capitan del Miculabo, na autoridad mga alas 10:30 del Lunes aga.
Si Daculan ya nombra lang con el suspechao como si alias Bonja, 22 años el edad y un residente del Barangay Miculabo, Picong, Lanao del Sur.
Asegun con Daculan, ya entrega el rendidor suspechao un calibre 5.56 milimetro rifle con un clip de bala y un granda de fusil.
Asegun con Daculan, el suspechao ya rendi amediante del sin descanso buscada con el siete suspechao del emboscada que ya ocuri del Abril 18 na Barangay Miculabo, Picong.
Uno del mga pulis el ya iri durante el emboscada que ya socede mientras estaba man patrulla y para birada ya na quartel el mga personajes del policia na municipio del Picong.
Del Viernes, Abril 19, el policia del Picong ya puede aresta con el uno del siete suspechao despues de un tirahan cuando ya ase sila entrada na lugar donde ta esconda mga suspechao na Barangay Miculabo.
Asegun con Daculan, ta continua el buscada con el restante sinco suspechao quien ta esconde dese’l mga autoridad. (B. Garcia)
