Maga Jovenes ya tiene el oportunidad sabe mas, aserca el lenguaje chabacano, el historia, ortografia y el estado de este na sociedad moderno, durante el Primer Chabacano Summit que ya conduci el Govierno Local del Viernes tarde, Junio 23 en celebracion del Dia de Fundacion Chabacano.
Sinco maga oradores recursos, con algo sabeduria aserca el lenguaje chabacano el ya discuti y ya contesta maga pregunta desde maga estudiante de varias escuela segundaria y colegio durante el summit. Sila amo el siguiente, Consejal Vincent Paul Elago, autor del Ordinanza de Dia de Fundacion Chabacano; Dr. Jose Genaro Yap-Aizon, presidente del Colegio de la Ciudad de Zamboanga; Arch. Ildefonso Torres, historian/ curator del Museo de Zamboanga; Dr. Victoria Mangaser, hefe del Curriculum and Instruction bajo na Deped Zamboanga y Mark Francisco, historian/ Assistant Professor na Western Mindanao State University.
Na su mensaje, el Alcalde John Dalipe, na representacion di Consejal Jerome Santos, ya encoraja con el maga jovenes para no hace por nuay nada el lenguaje chabacano cay este el un tesoro que necesita preserva y promova amediante el aparicion de lenguajes modernos.
Centro del discusion amo el historia de la Ciudad de Zamboanga, historia del lenguaje chabacano y maga residente; chabacano ficcion y literatura; ortografia, gramatica y istractura del lengaguaje chabacano y maga legislacion de lenguaje chabacano.
El Summit, que ya conduci na Astoria Regency na facilitacion del Oficina del Turismo bajo na Oficina del Alcalde, es uno del maga punto culminante del celebracion del Dia de Fundacion Chabacano que ta marca el establecimiento del lengguaje chabacano.
Este el aca-12 celebracion desde ya aprova el Ordinanza 374 que ta declara con el Junio 23 cada año como Dia de Fundacion Chabacano, que ta responde con el deseo para preserva y promova el chabacano, el que se llama Spanish derivative language, que ya principia del Junio 23, 1635 cuando ya coloca el piedra angular del Fortaleza de San Jose, que ahora conosido como el Fortaleza del Pilar.
(Source: City Government of Zamboanga Facebook Page, photo courtesy of Kathy Wee Sit)
