Zamboanga: Personalidad de droga muerto, otro 1 arestao

0
6
(Photo courtesy of PRO-9)

Un personalidad de droga el ya muri mientras otro uno el ya aresta y valor de P176,711.6 droga ilegal y pusil ya confisca el mga autoridad siguiendo el un tirahan na provincia del Zamboanga Sibugay, asegun con el policia del Martes.

Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya identifica con el muerto suspechao como si Hadjer Edris Jaamil y con el arestao suspechao como si Radzmer Sulayman Mayo.

Asegun con Masauding, el tirahan ya socede mga alas 9 del Sabado aga na Purok C, Barangay Salipyasin, Kabasalan, Zamboanga Sibugay.

Si Masauding ya habla, el tirahan ya socede despues que si Jaamil ya tira mientras ele y si Mayo ta escapa para na buugan cuando ya gole sila con el llegada del mga autoridad para servi orden de embuscada contra con el muerto suspechao por violacion del Ley de Republica 9165 y 10591.

El Ley de Republica 9165 conocido como el Comprehensive Dangerous Drugs Act of 2002 y el Ley de Republica 10591 conocido como el Comprehensive Firearms and Ammunition Regulation Act.

Asegun con Masauding, ya recubri na posesion de Jaamil un calibre .45 pistol con clip y seis bala, cuatro termosallada mediano sobrecitos plastico que ta contene valor de P136,000 de suspechao shabu, P1,300 dinero, y otros pa mga personal cosas.

Ya recubri na casa del Jaamil valor de P6,711.6 suspechao shabu y diferentes clase el parafernales de droga ilegal.

Ya confisca na posesion de Mayo valor de P34,000 suspechao shabu, un celpon, y un encendedor desechable.

Asegun con Masauding, con Mayo ya lleva na policia del municipio de Kabasalan para el propio documentacion.

Si Masauding ya alaba con el mga operativas del policia y militar por el exitoso operacion del aplicacion del ley que ya resulta na muerte del uno suspechao de personalidad de droga ilegal y el aresto del otro uno suspechao y el confiscacion de droga ilegal y mga armas de fuego. (B. Garcia)

Leave a Reply