Cuatro suspechao el ya aresta y valor de P34.3 millon droga ilegal ya confisca mga autoridad na tres separao campaña contra droga aqui na region y na region autonomo, asegun con el Philippine Drug Enforcement Agency (PDEA) del Martes.
Asegun con el PDEA, uno del cuatro arestao suspechao es un miembro del un grupo de sindicato criminal y otro uno, clasificao como un “high-value target (HVT)” y empleyado de gobierno y el de todo grande valor de droga ilegal ya confisca aqui na ciudad.
Asegun con el PDEA, con el mga arestao suspechao ya conose como canda Waham Ganih alias Alham Ganih, 59; Almujir Jumah, 37; Anthony Blanco Recososa, 37 y un empleyado de gobierno; y si Nidsam Sulaiman, 49, quien miembro del un grupo de sindicato criminal.
Asegun con el oficina regional del PDEA, con Ganih y Jumah ya aresta el combinao grupo del mga agentes del PDEA y policia na un “buy-bust operation” mga alas 11:13 del Lunes denoche na Zone 5, Calle Cariaga, Paseo de Gonzalez, Barangay Mercedes, en este ciudad.
Asegun con el PDEA, ya recubri na posesion de canda Ganih y Jumah mas o menos sinco kilos de suspechao shabu que tiene el valor de P34 millon, 949 pedaso de P1,000 como “boodle money” que ya pone insima un verdadero P1,000 como markao dinero, un vehiculo, y mga supo-supot y bolsa-bolsa.
Asegun con el PDEA, con Recososa ya aresta na otro “buy-bust operation” mga alas 7:35 del Lunes aga na Purok 1, Barangay Poblacion, Jose Dalman, Zamboanga del Norte.
El PDEA ya habla, ya recubri na posesion de Recososa, quien clasificao como un HVT suspechao un contractual empleyado del municipio de Jose Dalman, un gramo de suspechao shabu con el valor de P6,800, y markao dinero.
Asegun con el PDEA na Bangsamoro Autonomous Region in Muslim Mindanao (PDEA-BARMM), con Sulaiman ya aresta el combinao agentes de PDEA y personajes del policia mga alas 3:30 del Lunes tarde na Barangay Poblacion V, ciudad de Cotabato.
El PDEA-BARMM ya habla, ya puede confisca na posesion de Sulaiman mas o menos 50 gramos de suspechao shabu que tiene el valor de P340,000, “buy-bust money”, un celpon y tarjeta de identificacion.
El PDEA-BARMM ya habla, si Sulaiman un miembro de un grupo de sindicato criminal base na Dinas, Zamboanga del Sur que envuelto na mga atrocidades como trafico ilegal de drogas, robo, extorcion, matansa, secuestrando.
Con Sulaiman, quien un residente de Purok Lumati, Barangay Benuatan, Dinas, Zamboanga Del Sur, ya detene na carcel del PDEA-BARMM.
Asegun con el PDEA, ay planta asuntos contra con el cuatro arestao suspechao por violacion del “Comprehensive Dangerous Drugs Act of 2002”. (B. Garcia, photo courtesy of PDEA-9)