El mga autoridad ya aresta durante el un operacion de aplicacion de ley con un persona mas buscada na ciudad de Zamboanga, asegun con el alto official del policia del Miercoles.
Si Police Brigadier General Bowenn Joey Masauding, el director del mando regional del policia o Police Regional Office-9 (PRO-9), ya identifica con el arestao persona mas buscada como si Danilo Lim, legal el edad y listao como el numero ocho persona mas buscada na ciudad de Zamboanga.
Asegun con Masauding con Lim ya aresta el mga personajes del policia local y inteligencia na un operacion de aplicacion de ley por medio de servi’r orden de aresto mga alas 10:25 del Domingo denoche na calle Nicasio S. Valderoza, Barangay Zone 4, en este ciudad.
Si Masauding ya habla, si Lim tiene pendiente orden de aresto por el crimen de conducta lascivo y estatutorio abuso carnal sin recomandao piansa que ya dale el un corte na ciudad de Zamboanga.
Con Lim ya pone bajo’l temporario custodia del policia local antes que hay entrega conele na concierne corte.
“El PRO-9 ta reconoce con el esfuerzo del Zamboanga City Police Office na reciente operacion de policia que ya resulta na aresto del numero ocho persona mas buscada na ciudad de Zamboanga,” si Masauding ya habla. (B. Garcia)