El gobierno local bajo’l liderato del Alcalde John Dalipe ya honra con el mga atleta de Pencak Silat y Baseball por el de ila acomplicimiento na reciente competicion que ya lleba honor y orgullo con el ciudad del Zamboanga.
Asegun con Dr. Cecil Atilano, el director de deportes del ciudad, el mga atleta del Pencak Silat ya gana segundo puesto con 20 medalla de oro, 11 de plata, y cuatro de bronze durante el aka-12 Dinagyang Pencak Silat National Inter-School Championship 2024.
El concurso ya conduci na ciudad de Iloilo desde Enero 21 hasta Enero 26, 2024.
Si Atilano ya habla, el mga atleta de baseball ya gana el segundo puesto ambos na categoria de 13 años y menos y 12 y menos durante el Philippine National Series-Mindanao leg.
El concurso de baseball ya conduci na ciudad de Malaybalay, Bukidnon desde Enero 26 hasta Febrero 3, 2024.
El baseball team del ciudad ay participa na serie nacional en cualquier momento este año.
Si Atilano ya man hunto con Dalipe durante el ritos de reconocimiento del mga atleta Zamboangueños del Lunes en frente del City Hall.
(B. Garcia, photo courtesy of City Hall PIO)
