Zamboanga: Gobierno del ciudad ya compra vinta de aluminio

0
9
(Photo courtesy of City Government of Zamboanga)

El gobierno del ciudad ya compra 10 vinta de aluminio con remolque con el valor de P3 millon como parte del preparacion para el llegada del penomeno La Niña.

Con el mga vinta de aluminio ya distribui del Lunes con mga barangays propenso de avenida que ta inclui el Cabaluay, Curuan, Guiwan, Putik, Sangali, Santa Maria, Talisayan, Tetuan, Tugbungan, and Tumaga.

El Alcalde John Dalipe, quien ta encabesa con el City Disaster Risk Reduction and Management Council, ya apela con el mga recipiente barrios para maxmia con el uso del equipo para salva vida y propiedad na tiempo de emegencias o calamidad.

Si Dalipe, quien ya encabesa con el distribucion del mga vinta de aluminio, ya habla el gobierno del ciudad continuamente ta intensifica mga medidas para mitiga con el impacto del La Niña.

Asegun con Dalipe, con el mga vinta de aluminio ya compra usando el fondo bajo na Local Disaster Risk Reduction and Management Fund (LDRRMF) del 2022.

Cada un vinta de aluminium tiene el valor de P300,000, y equipado de seis chalecos salvavidas, dos saguan y 50 metros amaro.

El Senador Francis Tolentino, quien taqui na ciudad para supervisa con el conducida del Reserve Officers’ Training Corps (ROTC) Games–Mindanao Leg, ya man hunto con Dalipe durante el ceremonia de entrego del mga vinta que ya hace enfrente na City Hall.

El Philippine Atmospheric Geophysical and Astronomical Services Administration ta expecta el llegada del penomeno La Niña durante el mga meses de Julio, Agosto, y Septiembre, este año. (B. Garcia)

Leave a Reply