Ya anuncia el oficina del veterinario del ciudad cay ay ase ya sila un regular actividad el programa de capada para puede sirvi con mucho dueño de mga gato y perro.
Asegun con Dr. Mario Arriola, el veterinario del ciudad, cay ay ase sila el capada del mga gato y perro durante el ultimo Huweves del cada mes.
“Para puede toma parte na programa, el mga interesao dueño del gato y perro necesita registra na oficina del veterinario na Barangay San Roque cay hinde kame acomoda con aquellos quien ay anda lang derecho canamon,” si Arriola ya habla.
Si Arriola ya habla cay el capada del mga gato y perro amo el de todo buen manera para controla con el populacion y alarga con el vida del mga cuidao animal.
Asegun con Arriola cay base na un estudio, mas largo el vida del mga capao gato y perro comparando con el hinde capao.
Myentras tanto, alegre si Arriola nota cay mucho ya del mga dueño de gato y perro el ta preferi manda capa con el de ila mga cuidao animal. (B. Garcia) (Photo Courtesy of City Government of Zamboanga)