Con cuatro personas ya aresta y ya confisca mas de setenta’y sinco mil pesos valor de suspechao shabu maga autoridad na dos separao campanya contra droga ilegal del Domingo na municipio del Bongao, el cabesera del provincia de Tawi-Tawi.
Si Brigadier General John Guyguyon, el director rehyonal del pulisiya na rehyon autonomo, ya nombra con maga arestao suspechao como canda Hogan Husain, Annie Barahama, Arl-Bazhier Soriano, y si Annuar Saribban.
Asegun con Guyguyon cay canda Husain y Barahama ya aresta maga alas ocho veinte del Domingo aga na Barangay Pasigan, Bongao.
Ya puede recubri maga pulis na posesion de Husain in Barahama suspechao shabu que tiene el valor de veinte mil tresientos treynta’y dos pesos.
Asegun con Guyguyon cay canda Soriano y Saribban ya aresta na siguiente campanya contra droga ilegal del Domingo na Barangay Poblacion, Bongao.
Si Guyguyon ya habla cay ya confisca na posesion de canda Soriano y Saribban maga ocho gramos de suspechao shabu con el valor de sincuenta’y sinco mil pesos.
Asegun con Guyguyon cay el maga arestao suspechao detenido ahora na quartel del pulisiya na municipio de Bongao myentras esperansao planta asunto contra canila por violacion de Comprehensive Dangerous Drugs Act of 2002. (B. Garcia) (Photo Courtesy of Police Regional Office- Bangsamoro Autonomous Region)
