Ya affecta na avenida cuantos maga documentos, libro y otros pa maga galamiton na escuela de elementarya na Tugbungan.
Hasta na rudillas el hondura del agua na mencionao escuela por causa del fuerte aguasero que ya lleba el tipun paeng.
Después cancela el Aalcalde John Dalipe con el clase na todo nivel (level) ambos na escuela publico y privado este dia de viernes, Octobre Veinte Ocho, ya defiri tambien con el ceremonia de Investidura del maga nuevo miembros del Girl Scouts na escuela de elementarya na Tugbungan.
Asegun na entrevista que ya conduci el news team del RPN DXXX, Zamboanga con un maestra del mencionao escuela, temprano sila ya enderesa na de de ila maga classrooms, para salva con el maga importante equipo y maga papeles.
Asegun con Basilio Uy, el Education Program Supervisor, School governance and operation division-DepEd-Zamboanga City, ya dale ya sila aviso na maga escuela que ase mejoras para proteje con el mga propiedad del escuela y del maga maestra, maestro y maga estudyante. (B. Garcia)
