Ya aresta maga otoridad con un trainee del Philippine Coast Guard quien listao como el aka-sinco most wanted persona aqui na ciudad de Zamboanga.
Si Police Colonel Alexander Lorenzo, el director del Zamboanga City Police Office, ya nombra con el suspechao como si Ashurkan Arap, veinte siete años el edad y residente de Barangay San Roque, este ciudad.
Asegun con Lorenzo con Arap ya aresta el combinao personajes del pulisiya y coast guard maga ala una cuarenta’y tres del Martes tarde na centro de entreno del coast guard na Barangay Talisayan, este ciudad.
Si Lorenzo ya habla cay si Arap tiene el pendiente orden de aresto por el crimen de tres cuenta de rapto (three-count rape) sin piansa que ya dale el un jusgado del ciudad de Febrero veinte, este año. (B. Garcia)