El ciudadana mayor el ya muri na un incidente de incendio na un barrio na costa este del ciudad, asegun con el Zamboanga City Fire District (ZCFD) del Viernes.
Asegun con Superintendent Christopher Morales, el ZCFD marshal, el incendio ya ocuri maga alas 9:20 del Viernes aga na Paseo de Sotto, Barangay Divisoria, na costa este del ciudad.
Si Luisito Francisco, el dueño del casa que ya man uput na incendio, ya nombra con el fatalidad como si Chatra, su esposa.
Asegun con Morales, ta determina pa sila si cosa el origen del incendio, pero asegun con Luisito un pulao de petrolio el causa del quema.
Si Morales ya habla el incendio ya rasa con el casa de Lusito echo de ordinario materiales.
Asegun con Morales, completamente ya puede apaga mga alas 9:42 del aga con el incendio que ya alcansa na primer alarma.
(B. Garcia, photo courtesy of Zamboanga City Fire District (ZCFD))
