Mga autoridad ya intensifica el seguridad na provincia del Basilan para privini el repeticion de rebentada de bomba alla na de ila provincial.
El mejoras de seguridad ya implementa despue del incidente del Lunes denoche donde un bomba ya rebenta enfrente del City Hall del ciudad de Lamitan.
Asegun con Brigadier General Domingo Gobway, comandante del Joint Task Force-Basilan, nohay ningun hente ya queda victima durante el explosion que ya ocuri maga alas seies y media Lunes denoche na Barangay Maganda, ciudad de Lamitan.
Ademas, asegun con Gobway cay el fuersa del rebentada del bomba ya destrosa con un linia de agua potable y diutay destroso na dingding del edificio del city hall de Lamitan.
Asegun na inicial investigacion del pulisiya cay tiene kein ya puede columbra con dos desconosidos persona ya buta un bag pa adentro na coral del City Hall segundos antes del explocion.
El pulisiya del ciudad del Lamitan ta continue investiga sobre el incident para determina si kien el maga suspechao.
Nohay tamen ningung grupo o persona el ya declara cay sila el responsable na incidente. (Bong Garcia)
