El mga autoridad ya aresta con un guardia listao como numero uno persona mas buscada na un operacion de aplicacion de ley na ciudad de Zamboanga, asegun con el policia del Jueves.
El Zamboanga City Police Office (ZCPO) ya identifica con el arestao persona mas buscada como si Guillermo Cacananta Flores, Jr., 58 años el edad, un guardia y un vuido.
Asegun con el ZCPO, con Flores ya aresta na un operacion de aplicacion de ley por medio de implementa’r un orden de aresto del Martes, na Zona 6, Barangay Tulungatung, ciudad de Zamboanga.
Asegun con el ZCPO, si Flores tiene pendiente orden de aresto de dies cuentas abuso carnal sin recomendao piansa y listao como el numero uno persona mas buscada na nivel municipal.
Asegun con el policia, con Flores ya pone bajo’l temporario custodia del Zamboanga City Police Station 9 na Barangay Ayala, ciudad de Zamboanga.
“El seguridad y proteccion del mga mujeres y bata del ciudad de Zamboanga ta esta un importante iniciativa de amon. Dedicao came continua de amon implacable esfuerzos para lleva con el mga criminal na justicia y asegura el bienestar del de aton miembros del comunidad. Con el suporta del publico, hay continua came aresta con el mga criminal sin descanso,” ya habla si Police Colonel Kimberly Molitas, el interino director del ZCPO. (B. Garcia)