El mga autoridad ya aresta con el uno del mga personas mas buscada na provincia del Lanao del Sur, asegun con el policia del Jueves.
Si Police Colonel Robert Daculan, el director del policia na Lanao del Sur, nohay mas identifica con el aresta persona mas buscada con que ya aresta mga alas 3 del Miercoles tarde na Barangay Sunggod na municipio de Bubong na mencionao provincia.
Asegun con Daculan, el acusao listao como el numero 10 persona mas buscada na provincia del Lanao del Sur y el numero uno persona mas buscada na municipio de Bubong.
Asegun con Daculan, el arestao persona mas buscada tiene pendiente orden de aresto sin recomendao piansa por el violacion del Ley de Republica 10592 o mas conocido como el Comprehensive Firearms and Ammunition Regulation Act que ya dale el un corte na ciudad de Marawi, Lanao del Sur del Enero 14, 2025.
Si Daculan ya habla, el un corte na Ditsaan Ramain, Lanao del Sur, ya hace ya un final decision que ya sentencia con el arestao persona mas buscada del Enero 13, 2025 por violacion del Articulo 264 del Codigo Penal Revisado. (B. Garcia)