Ya aresta con sinco tripulantes y ya confisca dos barco de pesca mga autoridad na un campaña contra ilegal pescada na costa este del ciudad, asegun con el policia local del Jueves.
El policia local ya nombra con el sinco arestao tripulantes como canda Reymark Francisco, 28; Jhan Cabayacruz, 29; Mark Dela Torre, 27; Arnold Amil, 20; y si Edgar Salazar, 40.
Asegun con el policia, con el sinco ya aresta mga alas 6:30 del Miercoles denoche na mar na vicinidad del Barangay Bolong, na costa este del ciudad.
Asegun con el policia, ya aresta con el sinco tripulantes por causa ya falla sila presenta documento del dos barco de pesca y todo mga galamiton de pesca que ta usa sila sin el propio licensia.
Asegun con el policia, con el dos barco de pesca que ya confisca conosido como el “hulbot-hulbot”.
Ya confisca tamen na de ila posesion cuatro cajon de pescao que tiene el valor de P6,000.
Con el mga arestao tripulantes, dos barco de pesca, y mga galamiton de pescada ya lleba na quartel del Zamboanga City Police Station 3 y despues ay entrega canila na Oficina de Pesca y Recursos Acuaticos para el propio disposicion.
(B. Garcia, photo courtesy of Ronda Algie Rojas)